United kampion i Anglisë

Ndeshja derbi e javës së 37-të e Ligës Premier, e zhvilluar në Old Trafford, ndërmjet Manchester Unitedit dhe Arsenalit, ka përfunduar me rezultat 0-0, dhe në këtë mënyrë me një pikë të fituar Djajtë e Kuq janë shpallur kampionë të edicionit 2008/2009 të Kampionatit anglez.


Festa e lojtarëve të United. Foto: AP

Djajtë e Kuq e filluan takimin e të shtunës me vetëm një pikë larg titullit, që do të thoshte se edhe barazimi do të ishte mjaftueshëm që ata ta mbronin titullin e Kampionatit anglez.

Titulli i 11-të i PL i Sir Alex Ferguson me Unitedin. Foto: AP

Pjesa e parë

Përkundër rasteve të shumta në të dyja anët, pjesa e parë e takimit përfundoi pa gola.

Në 45 minutat e para të ndeshjes skuadra mysafire pati një dominim të lehtë dhe dukej se Topçinjtë kishin dëgjuar kërkesën e trajnerit të Liverpoolit, Rafael Benitez, për ta mposhtur Unitedin dhe për ta mbajtur gjallë shpresën e Redsave për t’u shpallur kampionë.

Mirëpo, përkundër disa tentativave të lojtarëve mysafirë, ata nuk arritën të shënojnë gol në portën e Van der Sarit, derisa kanë mundur të dënohen nga sulmi i Manchës, të cilët pritnin rastin e duhur për të dënuar.

Përgatitjet e tifozëve të Manchesterit. Foto: PA

Megjithatë, në fund të gjysmës së parë të lojës rrjetat mbetët të paprekura dhe skuadrat shkuan në pushim me rezultatin e fillimit të lojës.

Pjesa e dytë

Edhe në fraksionin e dytë të lojës skuadra e Arsenalit ishte më kërkuese ndaj golit, derisa në pjesën më madhe të gjysmës së dytë vendasit ishin të përqendruar te kundërsulmet.

Sezoni i fundit (ndoshta) i Carlos Tevezit te United. Foto: Reuters

Topçinjtë arritën ta menaxhojnë më mirë ndeshjen dhe patën më shumë raste, mirëpo ishin të pafuqishëm përballë mbrojtjes së fuqishme të Djajve të Kuq, përkundur se mungonte njeriu kryesor i mbrojtjes Rio Ferdinand.

Deri në fund të takimit nuk u shënua asnjë gol dhe ndeshja përfundoi me rezultat të barabartë pa gola.

Tifozët të bindur se titulli do të vinte të sot. Foto: AP

Me këtë barazim dhe këtë pikë të fituar Manchester United shpallet edhe matematikisht fitues i Ligës Premier për sezonin 2008/2009, një javë pa përfunduar Kampionati, dhe kështu barazon rekordin prej 18 titujsh me Liverpoolin.