Finlandezët kampionë botërorë në bartjen e grave

Një çift finlandez ka mundur konkurrencën në terrenin e vet dhe ka fituar në Kampionatin e sivjetmë në bartjen e grave i cili në Finlandë këtë vit është organizuar për të 14-tën herë me radhë.

Qyteti Sonkajarvi në lindje të Finlandës ka qenë nikoqir i kampionatit të sivjetmë. Në mesin e 35 çifteve nga pjesë të ndryshme të botës, përfshirë Japoninë, Australinë e Irlandën, ka fituar çifti vendas, ai finlandez.

Shpërblimi kryesor i kampionatit është po aq litra birrë sa është e rëndë gruaja. Edhe pse fituesi ka deklaruar se është marrë me sporte të ndryshme, por se ky është më i vështiri, terrenin përplot me pengesa e kanë kaluar për diç më gjatë se një minutë.

Bartja e grave nuk është gara e vetme bizare e cila çdo vit mbahet në Finlandë. Finlandezët janë nikoqirë edhe të Kampionatit botërorë të futbollit në baltë, garës së hedhjes së celularëve dhe Kampionatit botëror të qëndrimit në saunë.